美斯遇仇家必定抢缰　　今晚西甲尾场上演西超盃决赛翻版战，巴塞隆拿主场火併毕尔包。巴塞喺西超盃唔单止输畀「巴斯克雄狮」，队长美斯仲打人领红出场冇晒面，仇人见面分外眼红，呢位球王急于复仇必定抢缰，加上巴塞近期于联赛例打闪击战，半场主胜咪错过。

两队喺月中嘅西超盃决赛交过手，毕尔包踢到加时赢3比2封王，嗰场美斯伤愈复出冇盃捧之馀，仲愈踢愈躁，末段挥拳打向维拿利巴块面，搞到佢攞到自己喺巴塞生涯嘅首张红牌，幸最终只係被西班牙足总轻判停赛2场。美斯上仗刑满复出即有入波，协助巴塞喺西班牙盃以2比1淘汰华历简奴，跻身8强，今仗联赛再遇仇家，必定加多两钱肉紧。另一中场法兰基迪庄状态亦弗，近5仗轰入3粒，就算老将布斯基斯坐波监亦冇有怕。

毕尔包或「获利回吐」　　毕尔包自主帅马些连奴接手后，战绩全面反弹，更成功捧走西超盃，近7场取得5胜1和1负佳绩，但要留意输波嗰场，正正係联赛首循环主场不敌巴塞2比3，嗰场美斯仲省两粒添，小心佢哋「新帅效应」已过，连场报捷后「获利回吐」。

睇番巴塞近期出战联赛踢法抢缰，近6场联赛获5胜1和，而5场胜仗全部喺上半场已经取得领先优势，其中4次更係先拔头筹，可见主帅朗奴高文落咗「柯打」，叫球员趁对手未入局抢得就抢，预计今仗都会照办煮碗，一开波即揿住砌，希望速战速决，半场主胜有买趁早。